Во март 2025 година, НАСА лансираше мисија наречена SPHEREx од својата воздухопловна база Ванденберг во Калифорнија, која треба значително да придонесе за научните сознанија за небото и самите галаксии. Научниците од НАСА, Бет Фабински и Џејми Бок, кои беа директно вклучени во овој проект, зборуваа за оваа мисија.

SPHEREx, што е кратенка за спектрофотометар за историјата на универзумот, епоха на рејонизација и истражувач на мраз, беше лансиран во ниската орбита на Земјата на 11 март.

Како што објасни НАСА, за време на престојот во вселената, SPHEREx ќе создаде 3Д мапа од 450 милиони галаксии за да можат научниците да ги проучуваат ефектите од космичката инфлација, процес што се случил во првите трилионити од трилионитиот дел од секундата по Големата експлозија и предизвикал универзумот да се прошири милијарда трилиони пати.

Телескопот SPHEREx ќе ја проучува и колективната осветленост на сите галаксии во универзумот, давајќи им на астрономите нов начин да го проценат вкупниот број на галаксии и колку светлина произведуваат, вклучително и како тие бројки се промениле во текот на историјата на универзумот.

Мисијата ќе направи и над девет милиони набљудувања на нашата галаксија Млечен Пат, барајќи воден мраз, јаглерод диоксид и други молекули неопходни за животот каков што го знаеме, обезбедувајќи голем инвентар на изобилството на овие материјали во галаксијата Млечен Пат.

На прашањето што го прави овој телескоп различен од неговите претходници, НАСА одговари:

„Секој телескоп што НАСА го испраќа во вселената има специфичен сет на можности и предности. На некои прашања може да се одговори само со одредени телескопи, но почесто комбинацијата на податоци од многу телескопи, и минати и сегашни, води до големи откритија во астрофизиката. Со други зборови, новите телескопи како SPHEREx не се само напредни верзии на минатите телескопи, туку обезбедуваат нови можности за растечкиот сет на астрофизички алатки.“

Исто така, треба да се спомене дека овој телескоп е уникатен по начинот на кој комбинира две можности – целосно покривање на небото и можност за набљудување на секоја точка на небото во 102 инфрацрвени бранови должини.