Пиењето алкохол за време на празниците може да има многу посериозни последици од мамурлакот. Експертите велат дека прекумерното пиење алкохол може да предизвика и синдром на „празнично срце“, односно атријална фибрилација, која е предизвикана од неправилно и ненормално брзо отчукање на срцето.

Симптомите понекогаш нема да бидат јасни, но лцата кои се соочуваат со овој синдром може да забележат чувство на тресење или удирање во градите, како и вртоглавица, отежнато дишење и замор. Атријалната фибрилација е почеста кај постарите луѓе и оние со состојби како што се срцеви заболувања, висок крвен притисок или дебелина. Но, дури и навидум здравите луѓе може да го имаат овој синдром по празничното пиење, пишува „Медикал дејли“.

Едно истражување покажа дека во споредба со сите други недели од годината, значително зголемен број на посети во болница поради синдромот на „празнично срце“ (атријална фибрилација) има за време на божиќните и новогодишните празници.

Мускулите на срцевиот ѕид вообичаено се собираат за да се пренесува крв низ телото, а потоа се релаксираат за да се дозволи крвта повторно да влезе. Но, при атријална фибрилација, горните комори на срцето се собираат случајно и понекогаш толку брзо што срцевиот мускул не може правилно да се опушти помеѓу контракциите, намалувајќи ја ефикасноста и работата на срцето.

Вообичаени знаци на атријална фибрилација предизвикана од пиење вклучуваат, нарушен ментален статус поради алкохолизам, забрзано чукање на срцето или палпитации, болка во градите, висок крвен притисок, неправилен пулс, отежнато дишење и недостаток на енергија.

Состојбата може да се појавува наизменично, да трае неколку минути или часови или може да биде трајна. Ако трае подолго време, ќе треба редовно да го посетувате вашиот лекар за да го следи вашиот пулс и да спречи формирање на згрутчување на крвта.

Имено, атријалната фибрилација го зголемува ризикот од формирање на згрутчување на крвта во срцето. Ако згрутчувањето стигне до мозокот, тоа може да доведе до мозочен удар. Општо земено, луѓето со постоечки срцеви заболувања се изложени на поголем ризик од компликации како што се мозочен удар и срцева слабост.

Постојат неколку работи што можете да ги направите за да го намалите ризикот од развој на атријална фибрилација за време на празниците. Докторите советуваат да избегнувате прекумерно пиење, да не претерувате со храната, да останете активни и да се обидете да го намалите стресот.