Министерот за надворешни работи на Србија, Ивица Дачиќ очекува македонските власти да го екстрадираат поранешниот припадник на ОВК, Блерим Рамадани, но вели дека тоа е внатрешно прашање на Македонија.

-По многу луѓе кои учествуваа во тие злосторства за време на војните имаше распишано потерници, тие се и уапсени врз основа на тие потерници. Ние очекуваме дека ќе биде донесена одлука за екстрадиција, но тоа е внатрешно прашање на Северна Македонија – изјави Дачиќ одговарајќи на прашањето дали добил одговор од македонската Влада дали ќе го екстрадираат Рамадани.

МВР овој месец на граничниот премин Јажинце, на влез во државата го лиши од слобода Б.Р.(47) од Косово, врз основа на налог за апсење издаден од Интерпол Србија.

Од косовското МНР потоа информираа станува збор за Блерим Рамадани, поранешен припадник на Ослободителната војска на Косово (ОВК) во оперативната зона Неродиме и од македонските власти побараа негово ослободување.

Македонската полиција го уапси Блерим Рамадани, експрипадник на ОВК баран со потерница од Србија

Ден по приведувањето, на 18 јули, Основниот кривичен суд Скопје, на барање на Обвинителството за гонење организиран криминал и корупција на Рамадани му определи екстрадициски притвор.

Неколку дена подоцна, ветерани и членовите на семејството на поранешниот припадник на ОВК Рамадани, протестираа пред Основниот кривичен суд во Скопје и бараа негово ослободување.