Српскиот вицепремиер и министер за внатрешни работи, Ивица Дачиќ, попладнево ненајавено пристигна во Бања Лука, каде што се сретна со премиерот на Република Српска обвинет од федералното босанско правосудство, Радован Вишковиќ, јави Радио Сараево.

Тие разговарале за политичката ситуација во РС, БиХ и регионот, со осврт на безбедносните предизвици тука и во регионот. Теми биле и статусот на проектите што заеднички ги спроведуваат РС и Србија, како и за идната соработка, во чии рамки се планира одржување на заедничка седница на двете влади, соопштија властите во босанско-херцеговскиот ентитет.

Вишковиќ му се заблагодари на Дачиќ за доаѓањето на свечената академија по повод одбележувањето на 80-годишнината од победата над фашизмот, како и за поддршката и помошта што Србија ѝ ја дава на Република Српска.

Соговорниците заклучиле дека „српскиот народ направил огромна жртва за слободата“ и дека е потребно да се прослави 9 мај – Денот на победата над фашизмот.