Да бидеш волонтер значи да даваш нешто од себе, а за возврат да добиеш нови искуства, познанства и многу нови прилики, порачуваат од Волонтерскиот центар Скопје (ВЦС) по повод Светскиот ден на волонтерите што се одбележува на 5 декември. Денот ќе биде одбележан со настани и активности на кои заедно ќе учествуваат странски и македонски волонтери. Од ВЦС исто така ги повикуваат сите кои сакаат да станат волонтери или пак да се запознаат со нивната мисија да дојдат во нивната канцеларија и да слушнат искуства директно од волонтерите.

Во рамките на активностите вечерта е планиран и настан кој се вика „Јазично кафуле“ кој ќе се одржи во едно скопско кафуле, каде волонтерите организираат работилница во која ќе се изучуваат јазиците на волонтерите.

Во моментов во ВЦС волонтираат странски и македонски волонтери. Секој од нив доаѓа од различна држава и има различна лична приказна, а во моментов има волонтери од Франција, Полска и Германија. Тие со задоволство го споделија нивното искуство во работата на проект во Македонија, зборуваа за работилниците и активностите на кои учествувале досега и за придобивките на волонтери.

– Досега не сум волонтирала во многу проекти. Оние во кои сум волонтирала биле поврзани со училиште, па сега по завршувањето на средното училиште, сакав една година целосно да се посветам на волонтирањето. Одамна сакав да го направам тоа, но никогаш не го најдов вистинското време и место – рече Софија Абег, од Германија, волонтер во ВЦС.

Нејзината омилена работилница на која досега учествувала е всушност таа што ја организирала заедно со уште еден волонтер, а тоа било работилница за хеклање, за која вели дека била многу забавна и кул.

Своето искуство го сподели и Јакуб Покучињски, Полјак, кој веднаш по завршувањето на средното училиште се впуштил во волонтерски предизвик токму во Скопје, и вели дека ова е идеален предизвик за него.

– Ги запознав подобро Македонците, јадам многу ајвар, јадам многу македонска храна и мислам дека Македонија е одлична држава за да се истражува, иако е малку потценета во Европа. Би можел да кажам дека овој проект е буквално тоа што го барав, бидејќи ги опфаќа социјалните мрежи, работата во невладините организации, можеш да истражиш повеќе за „Еразмус плус“ проектите или работата во НВО. Тоа беше мојата цел и овој проект е идеален за мене, особено затоа што се одржува во Скопје – рече тој.

Стефан Николовски, волонтер во ВЦС, вели дека придобивките на волонтерите се навистина големи. Пред сè, волонтерите работат на себе и работат за подобра заедница. Тој вели дека ова е искуство кое не можат да го доловат само зборови и дека самите треба да го искусат, па ги повика младите да се приклучат на волонтирањето.

Како дел од активностите на волонтерите се помагање во „Дневниот Центар за деца од улица“ во Шуто Оризари. Тие два пати неделно ги посетуваат децата и им помагаат со решавање математички задачи, си играат со нив, им помагаат на стручните лица во домот и слично. Исто така учествуваат на базари, организираат работилници, но и пишуваат во месечното списание „Воисес“ кое го издава ВЦС во онлајн формат, каде теми создаваат волонтерите, на македонски, англиски или албански јазик.

Директорот на невладината организација, Никола Станкоски, за „Слободен печат“ ја објасни целта на ВЦС и нè воведе во нејзината работа:

– Волонтерскиот Центар Скопје, постои речиси 20 години. Заедно со други волонтери и пријатели го создадовме ВЦС и целта ни е, како невладина организација да им дадеме можност на младите преку неформално образование, поточно меѓународни проекти и младински активности на локално и меѓународно ниво – соопшти тој.

Како што вели Станкоски, во текот на една година ВЦС успева да прими 60 странски волонтери и тие, заедно со македонските учествуваат во најразлични активности како скопскиот „Виз-ер“ маратон, поддршка на фестивали, поддршка на маргинализирани и социјално загрозени групи и други.