Карциномот на грлото на матката може да се превенира и реално е возможно ниту една жена во светот повеќе да не го загуби животот од ова заболување. Цервикалниот карцином на грлото на матката е едно од најчестите заболувања кај жените во светот.

Кои се најчестите причини за појава на овој вид заболување?

– Главна етиолошка причина за појава на карцином на грлото на матката е инфекција со високоризичен тип на хуман папилома вирус. Тоа е вирус кој се пренесува со сексуален контакт, контакт кожа со кожа и од кој денеска се типизирани повеќе од 100 типови. Одреден дел од нив се ставени во групата на високоризични – кои најчесто се изолираат од цервиксот на жените кај кои е дијагностициран карцином на грлото на матката. Но, тоа не значи дека доколку вие имате високоризичен тип ХПВ вирус сигурно ќе развиете карцином на грлото на матката. Имуниот одговор на жената заедно со други фактори се тие кои го спречуваат развојот на карциномот и го победуваат вирусот.

Овој вид на карцином честопати е асимптоматичен, што дополнително ги намалува шансите за негово рано откривање. Колку и какви редовни, гинеколошки прегледи се потребни за да се намали ризикот од карцином на матка?

– Од сите карциноми што се јавуваат на гениталните органи, само за овој карцином постои превентивен скрининг преглед. Грлото на матката е достапно за визуелизација при гинеколошки преглед со спекулум како и за земање на материјал за ПАП тест (брис со кој се анализираат промените на клетките). Во последно време ПАП тестот се комбинира со земање на брис за ХПВ-типизација (за да се утврди присуството и типот на ХПВ вирусот). Денес голем број од развиените земји во светот се на работ да го искоренат постоењето на овој карцином, што е всушност и една од целите на СЗО за следниот десетгодишен период. Ова е карцином што можеме да го превенираме и реално е возможно ниту една жена во светот повеќе да не го загуби животот од карцином на грлото на матката. Но за тоа да стане реалност, потребно е сите жени да правиме редовен годишен гинеколошки преглед, ПАП тест еднаш годишно и ХПВ типизација на две до три години. Денес кога имаме превентивни методи на секое ниво, почнувајќи од примарната зараза со ХПВ вирусот, преку преканцерозите на грлото на матката и раните стадиуми на карциномот на цервикс, можеме со сигурност да кажеме дека овој карцином во 100% случаи е излечлив, само доклку се дијагностицира во раниот стадиум, за што е потребно едноставно еднаш годишно секоја жена да го посети својот гинеколог.

Каква е свеста кај нас за редовни гинеколошки прегледи и на кои начини може да се влијае на нејзино подигнување?

– Многу подобра во последните години. Особено кај помладите генерации и во градските средини. Кампањите, советите од медицинските лица, било преку традиционалните или дигиталните медиуми, достапноста и опсегот на информации на интернет, направија жените почесто да се обраќаат на гинеколог. Притоа тие се порелаксирани во текот на гинеколошкиот преглед, знаат отворено да зборуваат и да бараат решение за своите проблеми. Но, за жал постојат и жени до чија свест информацијата за редовен годишен гинеколошки преглед не допира. Едноставно немаат навика да одат на превентивни гинеколошки прегледи, кои се клучни за да превенираме многу болести или рано да ги откриеме. Сметам дека и ова интервју ќе помогне да ги натераме жените редовно да земаат ПАП тест. Ако успееме вие како медиум и јас како доктор заедно да убедиме барем една жена да отиде на гинеколог со овој разговор, тогаш нашата задача е успешна. И последно, но не и најмалку важно: следете ги медицинските препораки за годишни прегледи и скрининг методи во согласност со возраста!

Центарот за женско здравје при Клиника „Жан Митрев“ во месец март, со цел подигање на свеста за превенција од канцер, нуди пакет за сите оние кои ќе направат ПАП тест – гинеколошкиот преглед е на половина цена! Не чекајте, закажете го вашиот преглед или навремена консултација на 02/3091-484. Тимот на Клиничката болница „Жан Митрев“ Ви стои на располагање.

*Комерцијален текст.