Извесен Маријан Џон Маркул од Лос Анџелес во 1955 година на агентите на ФБИ детални им ја раскажал својата средба со поранешниот претседател на СФРЈ, Јосип Броз Тито, за кој тврди дека бил руски агент.

– Лицето кое денеска се претставува како маршал Тито всушност не е вистинскиот Јосип Броз Тито, туку станува збор за руски агент кој го украл неговиот идентитет во 1937 година – изјавил тогаш тој.
Маркул, во разговор со агентите на ФБИ, изразил загриженост околу вистинскиот идентитет на Тито.

Овој извештај се наоѓа во еден од илјадниците документи кои неодамна американските власти го отворија за очите на јавноста.

Во споменатиот документ се наоѓаат и информации за самиот Маркул, за кој се знае дека е роден во 1909 година во Ливн и дека станал американски државјанин во 1944 година. Во САД емигрирал во 1936 година, а учествувал во Втората светска војна како член на американската војска.

Во извештајот стои дека сепак не е сигурно колку информациите кои Маркул ги дава се точни, но се тврди и дека неговата приказна дека е тој „социјалист и дека сака да дава ибнформации кои би можеле да бидат значајни за безбедноста на САД“.

Маркул во 1953 година ја посетил Југославија и во две прилика разговарал со Тито. При првата посета, тој забележал дека Тито ги има сите десет прсти нарацете, па додава дека на вистинскиот Маршал му недостасувале два прста, по еден од двете раце.

Маркул исто така забележал дека Тито од 1953 година бил многу образован и одлично свирел клавир, нешто што исто така не се совпаѓало со неговиот претходни сознанија за маршалот.

Уште една работа која не се поклопувала била висината на Тито. Маркул тврдел дека вистинскиот Броз бил висок околу 180 сантиметри, а дека човекот со кој се сретнал во 1953 година бил висок околу 160 сантимери.

Тој додава и дека „новиот“ Тито имал благ руски акцент и зборувал со помек глас, додека оној стариот бил поостар и доста погруб.

Маркул „стариот“ Тито го запознал во 1928 година во Југославија, а со него се сретнал во Париз во 1935 и 1936 година и додава дека е цврсто убеден дека токму тоа е вистински Тито.

По средбата со „лажниот“ Тито, Маркул заминал за Загреб во посета на својата сестра Ана, со која ги делел своите сомненија, за потоа и нејзиниот сопруг, извесен Борис Гориќ, да потврди дека и тој не е сигурен во идентитетот на Тито, како и дека тоа е нешто за што потскриено зборува цела Југославија.

Во извештајот стои дека сестрата на Маркул му кажала дека ниту таа ниту нејзиниот сопруг не веруваат во тоа дека на чело на Југославија се наоѓа вистинскиот Јосип Броз Тито и дека првпат почнале да се сомневаат уште во 1937 година, кога го слушнале неговиот глас на радио и забележале промени во акцентот. Маркул тврди дека неговиот татко Иван го познавал вистинскиот Тито, бидејќи работеле во ист град, и дека и тој е согласен за тоа дека се работи за две различни личности.

Маркул при престојот во Југославија се сретнал и со Александар Ранковиќ, со кого разговарал околу три часа. За Ранковиќ, Маркул тврди дека бил главниот човек задолжен за безбедноста во Југославија, како и дека во разговор со него тој му ги изложил своите сомненија, на што Ранковиќ одговорил дека тој не треба да се занимава со тие работи туку да ужива во својот престој во Југославија.

Маркул на агентите на ФБИ им раскажал дека, според негово мислење, југословенските медиуми во тајност соработувале со силите на Советскиот Сојуз и дека тоа во наредниот период ќе стане кристално јасно. Изразил увереност и дека советските власти, ако имаат потреба од тоа, многу лесно би можеле да се ослободат од Тито.

Маркул на крај заклучува дека југословенската влада глумела дека е во кавга со Советскиот Сојуз за да добие помош од САД, како и дека никогаш не дошло до вистински конфликт меѓу овие две држави.