Од Центарот за управување со кризи информираат дека денеска до 20:00 часот на територијата на државата се регистрирани вкупно 31 пожар на отворен простор, од кои два се активни и уште два се под контрола, а изгаснати се 27 пожари.

Според ЦУК, активни се пожарите кај село Никуштак во Липковско, каде гори нискостеблеста шума, и во селата Варвара и Драчевица во Општина Студеничани каде е опожарена мешана шума и ниска вегетација.

Под контрола се пожарите во Општина Берово во Дрџински рид, м.в. Стојковото, село Русиново каде е зафатена дабова и букова шума и папрат и во Вардариште во Општина Гази Баба каде гори ѓубриште.

Изгаснати се 21 пожар во повеќе општини во државата каде горела главно ниска вегетација, во Општина Ресен на место викано Порој биле зафатени и јаболкови насади, во Општина Липково во селата Оризаре и Слупчане била опожарена и мешана шума и ниска вегетација, а во Општина Старо Нагоричане с. Младо Нагоричане, маало Бузанци била зафатена од пожар кровна конструкција од плевна, наведуваат од ЦУК.