Британскиот премиер Риши Сунак предвидува „тешка и опасна деценија“ во поглед на одбраната, безбедноста и надворешната политика. ВО документ објавен денеска, тој предупреди дека руската инвазија врз Украина и кинеската агресија кон Тајван се закануваат да создадат свет „дефиниран од опасност, неред и поделеност“.

Документот од 63 страници предупредува дека светот се соочува со најголеми ризици, вклучително и „неконтролиран конфликт“ со нуклеарно оружје. Во документот се наведува дека најнепосреден безбедносен приоритет е справувањето со заканата од руската војна во Европа.

Сепак, се предупредува дека секоја идна војна во Индо-Пацификот, каде што се зголемија тензиите со Кина поради Тајван, може да има „глобални последици поголеми од конфликтот во Украина“. Иако документот не ги промени фундаменталните оценки на оригиналниот преглед, објавен во 2021 година, кој беше пред целосната инвазија на Русија на Украина, јазикот во ажурираната верзија е поостар.

Документот беше објавен пред буџетот на владата во средата. Тој постави план за зголемување на трошоците за одбрана на ОК на 2,5% од БДП, од нешто повеќе од 2%, но без поставување распоред.

„Постојат сè поголеми изгледи дека меѓународната безбедносна средина дополнително ќе се влоши во наредните години, со порастот и диверзификацијата на државните закани во Европа и пошироко. Развиени и тестирани или усвоени се напредни оружени системи“, се вели во документот.

Дополнително, причина за загриженост е слабеењето на низата договори за контрола на оружјето меѓу Соединетите Држави и Русија.

„Стратешките механизми за стабилност кои во 21 век помогнаа да се ублажат ризиците од недоразбирања, погрешни пресметки и ненамерна ескалација не се развија со темпото потребно за да се осигура дека конкуренцијата нема да се прелее во неконтролиран конфликт“, се вели во текстот.

„Тензиите во Индо-Пацификот се зголемуваат и конфликтот таму може да има глобални последици поголеми од конфликтот во Украина“, се додава. Исто така, се истакнува растечката закана од Иран, кој напредува во својата програма за нуклеарно оружје. Се споменува и Северна Кореја, која „се стреми да ги развие своите нуклеарни капацитети додека спроведува регионално дестабилизирачки активности при ракетни тестови кои им се закануваат на нејзините соседи“.