Ако може да се верува на американската ЦИА, Босна и Херцеговина моментално има повеќе од 3,7 милиони жители, односно околу 200 илјади повеќе отколку во 2013 година, кога беше спроведен последниот попис на населението.

Ваквите информации беа објавени на официјалната веб-страница на ЦИА, во делот наречен „Светска книга со факти“, чија содржина беше ревидирана на 13 август, за време на администрацијата на Доналд Трамп, кој го назначи својот лојалист Џон Ратклиф за шеф на агенцијата, пренесува Н1 телевизија.

Според овие податоци, врз основа на проценка од 2024 година, во Босна и Херцеговина живеат 3.798.671 жители. Како ЦИА дошла до оваа бројка е нејасно, бидејќи проценките на демографите покажуваат дека од 2013 година, поради политичката нестабилност и лошата економска состојба, неколку стотици илјади луѓе ја напуштиле земјата, па се верува дека вистинското население не надминува 2,9 милиони.

ЦИА не го прецизира уделот на поединечните национални групи во вкупното население, туку се повика на резултатите од пописот од 2013 година, кога Бошњаците беа 50,1 процент, Србите 30,8 проценти и Хрватите 15,4 проценти.

Истите проценти беа користени за религиозната припадност – муслимански, православни и католички заедници. Интересни се и набљудувањата на аналитичарите на ЦИА за историското име на Босна и Херцеговина. Тие наведуваат дека поголемиот дел од земјата, односно нејзиниот северен дел, го добил своето име од реката Босна, додека „помалиот јужен дел“ го добил своето име од „старосрпскиот збор“ херцег, што значи војвода.

Златниот крин е наведен како национален симбол. Меѓу другото, ЦИА се занимавала со податоци за консумирањето алкохол во Босна и Херцеговина. Ова го наведуваат проценките од 2019 година, според кои секој жител на БиХ годишно пие просечно 5,46 литри чист алкохол преку разни пијалоци, а пивото е предводник.