Американската актерка Кортни Кокс (59) неодамна изјави дека нејзиниот пријател и колега од култниот ситком „Пријатели“ („Friends“) Метју Пери ја „посетува“ дури и по неговата смрт.

Да потсетиме, Пери почина на 54-годишна возраст на 28 октомври минатата година.

Кокс и Пери ги глумеа ликовите на Моника и Чендлер во „Пријатели“ од 1994 до 2004 година. Кокс сега изјави дека сè уште го „чувствува“ Пери околу неа, седум месеци по неговата смрт.

„Толку сум благодарна што бев во можност да соработувам толку блиску со него толку многу години“, рече таа за време на гостувањето во утринската емисија на „Си-би-ес“. „Тој често ме посетува, ако веруваме во нешто такво“.

Актерката додаде дека сè уште разговара и со починатите членови на нејзиното семејство.

„Зборувам со мама, тато, Метју. Чувствувам дека има многу луѓе кои нè водат. Чувствувам дека Метју е дефинитивно таму“, рече Кокс.