Издавачката групација, кафе-книжарница, галерија и арт принт-студио „Чудна шума“ на крајот од претходната година извести дека за нив 2024 беше особено исполнета година – од првиот до последниот ден – со книги, со слики и зборови, со прекрасна уметност, со изложби и фестивали, настани и промоции, гостувања и песни, музика и потпишувања, цртање и сликање и со феноменални фотографии, со многу средби и патувања, со нови пријателства и плодни партнерства.

– Оние кои добро нѐ познаваат – знаат дека не ги мериме работите со бројки, туку со содржини – а 2024 беше токму таква – исполнета со предизвици и успеси, со возбуда и радост, со напорна работа и признанија за вложениот труд – истакнуваат од „Чудна шума“.

Со гордост тие посочуваат дека три нивни изданија освоија значајни награди: „Забранетата соба“ на Александра Симова Клинчарова со илустрации на Хари Дудески беше вклучена во каталогот „White Ravens“ за 2024 година; „Земјата на заборавените сказни“ на Билјана С. Црвенковска со илустрации на Оливер Коларевски ја доби наградата „Ванчо Николески“ на ДПМ за 2023 година; „Момчето од зборови – Девојчето од ноти“ на Катерина Николовска доби две признанија на Саемот на книга од Македонската асоцијација на издавачи (МАИ).

– Нашето принт-студио „Чудна шума АРТ“ стана прво сертифицирано студио на „Hahnemühle“ во регионот, здобивајќи се со златен сертификат за квалитет. Преведовме и објавивме прекрасни изданија во рамки на два проекти – „Млади европски приказни“ и „Планета Надеж (нова европска проза)“, издадовме феноменални нови книги за деца и млади од македонски автори и илустратори, во нашето принт-студио ги испечативме делата за изложбите на нашите уметници и фотографи Киро Урдин, Љубомир Трајковски, Јелена Белиќ, Ристо Костовски, Цветан Гавровски, Иван Блажев, Тони Васиќ, Александар Томовски, Давор Кешќец, Вања Димитрова, Љупчо Јованов, Каја Тасевска, како и дела од повеќе фотографи од изложбата „Денови на македонска фотографија“. По четврти пат го организиравме нашиот фестивал што ја слави книжевноста и креативноста на младите – „YES фестивал: Млади европски приказни, млади креативци“, со гости од Македонија и странство. Ги посетивме саемите на книга во Болоња и Франкфурт, во Загреб и Љубљана. Ја одржавме втората конференција на издавачи во Охрид – истакнуваат од „Чудна шума“.