Македонската женска кадетска ракометна репрезентација загуби од Норвешка со 32:21 во разигрувањето за пласман од деветтото до 16 место на Европското првенство.

Тоа е веќе четврти пораз за избраничките на селекторот Кристијан Грчевски кои во текот на мечот со Норвежанките беа рамноправни во одредени период, но на крајот ривалот стигна до убедлива победа.

На семафорот имавме двапати нерешен резултат 5:5 и 7:7, во следниот период имавме негатива од 13:11, а на паузата Норвешка замина со „плус четири“ предност (15:11).

Се држевме и на стартот од вториот дел кога беше само 19:17 за Норвешка, а потоа следуваше серија од пет голови во низа за 24:17 што се покажа како клучен период за крајниот епилог.

За нашата селекција на денешниот дуел најефикасна беше Младеновска со седум голови, два помалку имаше Кралева.

Следниот меч на Европското првенство македонските ракометни надежи ќе го имаат в среда (9 август) од 13.30 часот против Португалија.