Во Македонија евидентирани се четири нови случаи на голема кашлица, со што бројот се зголеми на вкупно 22 од почетокот на годината.

Информацијата за МИА ја потврди портпаролот на Комисијата за заразни болести, Злате Мехмедовиќ.

Комисијата за заразни болести заседаваше вчера и предложи да се прогласи епидемија на територијата на Скопје, со препораки да не се примаат во градинките децата кои што ги немаат примено сите дози од ДиТеПер вакцината која заштитува од пертусис.

-Се одлучивме да препорачаме прогласување на епидемија за град Скопје. Ова звучи малку страшно „епидемија“, но реално треба да ни олесни во справувањето со ризикот кој доаѓа со болеста голема кашлица. Го подготвуваме Упатството за постапување во услови на епидемија што го спрема ИЈЗ и клучните активности се да се надополнат пропуштените дози вакцини. Опфатот на вакцинација со пертусис не е на задоволително ниво. Ќе ги повикуваме сите што ја пропуштиле вакцинацијата, ќе предложиме вакциналните пунктови да работат во 2 смени и во сабота. Препорачуваме забрана за прием на невакцинирани деца во градинки. Оваа болест е најтешка за најмалите, рече претседателот на комисијата за заразни болести професор доктор Александар Петличковски.

Вакцините се примаат на два, четири, шест, осумнаесет месеци и на 7 години. Децата што се нецелосно или невакцинирани сепак ќе имаат право да одат на училиште.

Епидемија на магарешка кашлица во Скопје: Градинките нема да примаат невакцинирани деца