Британската влада ја одобри продажбата на групацијата која ја контролира Кралската пошта (Royal Mail) на чешки милијардер, дозволувајќи јавната поштенска компанија да премине во странска сопственост за првпат во нејзината 500-годишна историја.

Властите потврдија дека групата на милијардерот Даниел Кретински може да ја преземе сегашната компанија International Distribution Services (IDS), која управува со британската државната пошта, за 5,3 милијарди фунти (6,69 милијарди евра), пренесе „Ројтерс“.

Кретински и IDS се согласија на договорот во мај, но чекаа формално одобрување според законите за национална безбедност поради важноста на поштенската услуга во Обединетото Кралство.

Компанијата ќе остане со седиште во Британија, а како дел од договорот, британската влада ќе го задржи таканаречениот „златен удел“, што значи дека ќе мора да ги одобри сите клучни промени во сопствеништвото на Поштата.

Кралската пошта е една од најстарите институции во Обединетото Кралство – таа започнала со работа во 1513 година, како служба во рамки на кралскиот двор. Таа станала јавна поштенска компанија во средината на 17-от век.

Продадената компанија, која беше приватизирана во 2013 година, се бореше да се прилагоди на пазарот во последниве години, бидејќи бројот на луѓе кои користат поштенски услуги продолжува да опаѓа.

Кретински има деловни интереси низ Европа, вклучувајќи го и Еурстрим, кој транспортира руски гас преку цевководи низ Украина, Чешка и Словачка. Таа веќе поседува 27 отсто од акциите во IDS, а исто така има удел во трговците на мало во Велика Британија, вклучувајќи го и водечкиот синџир супермаркети Sainsbury’s.

Неговата фирма претходно соопшти дека гледа на IDS како силен бизнис со потенцијал да стане водечка поштенска логистичка групација во Европа.