Холивудскиот актер Ченинг Тејтум откри детали за разводот од својата поранешна сопруга, актерката Џена Деван, со која ја имаат 12-годишната ќерка Еверли.

„Тоа е зад нас. Но навистина е тешко што не можам да ја гледам ќерка ми цело време. Би сакал да бидам покрај неа постојано“, изјави Тејтум за списанието „Варајети“.

Тејтум и Деван го финализираа разводот во септември 2024 година, по шест години судска борба. Бившите сопружници се договорија за заедничко правно и физичко старателство над Еверли.

Постапката за развод била долга и тешка, а еден од спорните моменти била заработката на актерот од филмот „Магичниот Мајк“ (Magic Mike). И покрај тоа, денес двајцата тврдат дека се во добри односи.

„Џена и јас сега сме добро, но тоа беше болна разделба, особено затоа што бевме толку млади. Се трудевме да ја одржиме врската, се обидувавме година и пол, но знаевме дека е готово… Да не навлегувам сега во сè“, изјави актерот.

По разделбата, и двајцата започнаа нови врски. Тејтум беше три години во врска со актерката Зои Кравиц, со која дури и се вери. Но тие раскинаа минатата година. Денес, Ченинг е во врска со манекенката Инка Вилијамс.

Џена Деван, пак, е свршена со актерот Стив Кази од 2020 година, а заедно имаат две деца – синот Калум и ќерката Ријанон.