Претседателот на УЕФА, Александер Чеферин, испрати остри критики до италијанските фудбалски власти, предупредувајќи дека инфраструктурата во оваа земја е на незавидно ниво и дека е крајно време за конкретни чекори.

„Веќе сум уморен од бескрајните разговори за состојбата со стадионите во Италија. Сè останува само на зборови, а ништо не се менува. Клубовите имаат итна потреба од поддршка – од државата, од општините, но и од приватниот сектор. Ситуацијата е навистина загрижувачка, време е за акција,“ рече Чеферин, испраќајќи јасна порака до фудбалските и политичките структури на Апенинскиот Полуостров.

Тој додаде дека гледа позитивни сигнали и изрази надеж дека конечно ќе се направи пресврт.

„Имам доверба во Габриеле Гравина, кој е и мој заменик. Знам дека ќе вложи максимални напори. Верувам дека италијанската влада сега конечно разбира колку е итно да се делува. Сигурен сум дека Италија ќе биде ко-домаќин на ЕУРО 2032,“ додаде првиот човек на европскиот фудбал.

Италија и Турција веќе ја поднесоа својата заедничка кандидатура за организација на Европското првенство во 2032 година, и многумина очекуваат УЕФА да ја поддржи. Но, изјавите на Чеферин се сериозен сигнал дека за да го добијат домаќинството, Италијанците ќе мора да покажат далеку поголема решеност и конкретни резултати на теренот.