Тренерот на Барселона, Чави Ернандез е убеден дека реваншот од четвртфиналето против ПСЖ (вторник, 21.00 часот) во фудбалската Лига на шампионите ќе биде многу тежок и покрај тоа што неговиот тим победи со 3:2 во првиот меч во Париз.

Барселона е во водство, има еден гол позитива, а ПСЖ мора да нападне и се обиде да ја анулира негативата.

– Тоа е многу голема можност за нас како клуб. Играме дома, што е плус – Монжуик треба да обезбеди магична ноќ како на „Камп Ноу“ претходно. Ќе биде како првиот натпревар. Ќе имаме висока одбранбена линија, мораме да покажеме карактер, да продолжиме, мислам дека нашите шанси се еднакви, тие се еден од најдобрите тимови и го имаат еден од најдобрите тренери во светот – рече Чави на прес-конференцијата.

Според стратегот на каталонскиот гигант клучот за успехот е тимот – во одбраната, во нападот. Неговите играчи мора да се жртвуваат на теренот за секоја топка доколку сакаат пласман во следната фаза од ЛШ.

– Победата ни даде самодоверба дека можеме да се натпреваруваме со еден од најдобрите тимови во светот. ПСЖ и генерално тимовите на Луис Енрике секогаш напаѓаат. Уште повеќе кога губат – вели Чави.