Царинската управа заплени минибус со албански регистарски таблички  кој бил специјално адаптиран за шверц на стока. Во минибусот во кој што се вршел превоз на патници на релација Тирана-Брисел биле направени бункери наменети за криење стока, во обид да се прикријат истите, биле покриени со тапацир.

Случајот е откриен на влез на граничниот премин Табановце од страна на царински инспектори од мобилниот тим од Секторот за контрола и истраги, кои ја извршија контролата на минибусот. По поднесена пријава до надлежниот суд, истиот донесе одлука за одземање на возилото, а изречена е и глоба за возачот на возилото заради прекршување на член 263 став 7 и член 269 став 2 од Царинскиот закон.

Ова е втор случај во една недела на заплена на возило специјално конструирано, адаптирано и прилагодено со цел криење стока. Од Царинската управа велат дека и натаму во рамките на своите надлежности делуваат во насока на заштита на финансиските интереси на државата и заштита на безбедноста и здравјето на граѓаните.