Првото издание на фестивалот „Буквално. Џез.“ од 19 до 25 мај се одржува во „Буква“ во Скопје. Фестивалот беше отворен на 19 мај со предавање на проф. д-р Владимир Мартиновски на тема „Џез: звук, слика, збор“ и отворање на изложбата „Џез“ на Диме Темков и Лучка Кошчак, кое беше придружено со ритмички илустрации на Михаил Парушев, по што следуваше вечерен џез-концерт на „Зулу 3.4“.

На фестивалот можеа да се слушнат џез-вињети на Александар Прокопиев, џез-анимации во селекција на Марија Савелева, „Азбука на скопскиот џез“ со Кирил Темков, а следуваат сегментите „Шпаклофонија“ – инструМентални експерименти со Владимир Лукаш, Виктор Танасковски и Тома Димовски, ликовна импровизација со Доротеј Нешовски и „Дај од џезот“ – танцов мастерклас со Билјана Грозданова.

Во селекцијата на вечерните концерти се групите „Свинг 42“, „Хот џез оркестар“, „Такси конзилиум“, „Одрон ритуал оркестар“ и настап на Звук Караџиќ, а се одржа и џез-сет со Игор Спироски и Шурбе.

Организатори на фестивалот се Андреј Јованчевски, Анастасија Овчаренко и Александар Сандревски.

(Текстот е објавен во „Културен печат“ број 282, во печатеното издание на весникот „Слободен печат“ на 23-25.5.2025)