Прославениот италијански голман Џанлуиџи Буфон (46) во разговор за „Кориере дело Спорт“ призна дека е зависник од обложување, но и дека боледувал од депресија.

Во разговорот по повод претставувањето на неговата автобиографија под името: „Џанлуиџи Буфон, падни, стани, падни стани“, славниот чувар на мрежата откри некои непознати детали.

„За одредени луѓе тоа е порок, за мене е адреналин. Во едно сум сигурен, никогаш не сум направил ништо противзаконски. Всушност никогаш не сум бил под истрага, ниту пак сум добил опомена. Се обложував само на кошарка и тенис, никогаш на фусбал“, изјави Буфон.

Потоа зборуваше и за проблемите со депресијата.

„Одбивав лекови, а ми беа потребни. Се плашев да не ми створат зависност. Одев на доктор само три или четири пати, но ми даде вреден совет: Негувај ги своите интереси, немој да се фокусираш само на фудбалот. Тогаш го открив сликањето“, изјави Буфон.

Буфон во овој момент е член на стручниот штаб на репрезентацијата на Италија која од клупата ја предводи Лучијано Спалети. Во својата кариера голот на Италија го чуваше дури на 176 натпревари, а успеа во 2006 година да стане и светски шампион.