Листата на милијардери на „Форбс“ доби уште едно ново име.

Американскиот рок пејач Брус Спрингстин, кој стана гласот на рокенролот на работничката класа, влезе на листата на милијардери на „Форбс“, а неговото богатство се проценува на 1,1 милијарда долари, пишува „Гардијан“.

Голем дел од тоа богатство се акумулирало во последните неколку години. Во 2021 година, Спрингстин го продаде целиот свој музички каталог – еден од најомилените дела во поп и рок, со преку 300 песни кои опфаќаат 20 студиски албуми и дополнителни изданија – на „Сони“ за пријавени 500-550 милиони долари. Договорот беше најголемиот досега за музички каталог, надминувајќи го претходниот рекорд од 300 милиони долари платен од „Јуниверзал“ за каталогот на Боб Дилан во декември 2020 година.

На 74 години, музичарот сè уште прави големи, профитабилни турнеи; „Полстар“ објави дека во 2023 година, Спрингстин продал повеќе од 1,6 милиони билети за концерт, со што генерирал приход од 380 милиони долари.

Спрингстин (74) во моментот е на турнеја каде што одржува тричасовни концерти, а собрал богатство во текот на шестдецениската пејачка кариера. Покрај Спрингстин, на листата на милијардери се и американските пејачки Ријана, Џеј Зи и Тејлор Свифт.