Одличен успех оствари македонскиот женски ракометен клуб Ѓорче Петров кој обезбеди пласман меѓу најдобрите осум во Европскиот куп. Денеска во реваншот во Чешка ракометарките на тренерот Симе Симовски загубија минимално со 34:33 против Кинжварт.

И покрај поразот нашиот претставник успеа да ја одбрани предноста од првиот меч во Скопје кога славеше со три голови разлика 32:29.

Во почетните 10 минути од мечот се водеше рамноправна борба, и двете екипи се менуваа во минимално водство, по што ЖРК Ѓорче Петров почна да одржува позитива од еден до два голови разлика (10:8, 11:9, 12:10).

На четири минути пред крајот со голот на Коларовска ЖРК Ѓорче Петров стигна и до „плус три“ (16:13), а непосредно пред паузата и до највисоки 19:15 и 20:16.

Ваквата убава позитива од четири голови разлика траеше до 40 минута (24:20), а потоа следуваше пад во играта што го искористи ривалот за серија од 6:0 и загрижувачки два позитива за чешкиот состав.

Не се предаваше ЖРК Ѓорче Петров, не му дозволуваше на Кинжварт да направи целосен пресврт во резултатот, иако константно домаќинот водеше со еден гол разлика, веднаш следуваше израмнување.

Во последната минута Кинжварт повторно дојде до „плус два“ (34:32), но со новиот погодок на Коларовска веќе немаше време за нешто повеќе и сите дилеми беа решени во овој двомеч и ЖРК Ѓорче Петров го славеше пласманот во следната фаза.

По шест погодоци на овој натпревар за македонската екипа имаа Дамјаноска и Николовска, а по пет Коларовска, А. Јанкуловска и Ризоска.