Младинската ракометна репрезентација на Македонија со победа го заврши настапот на Европското првенство за играчи до 20 години.

Во СС „Головец“ во Целје, Словенија, избраниците на селекторот Раде Стојановиќ со резултат 30:29 славеа против Франција.

По првото полувреме имавме и водство од пет голови разлика (15:10). На тој начин нашите ракометни надежи го освоија деветтото место на евро шампионатот.

Еден од хероите за победата на Македонија беше голманот Галевски кој им одбрани пенал на Французите во последните моменти од натпреварот.

Кај стрелците најефикасни беа Субашевски и Митев со по шест голови, а пет реализираше Узунчев.

Дефинитивно Македонија има ракометна иднина, на ова ЕП нашата селекција стартуваше со триумф над Црна Гора (31:21), па ремизираше со Хрватска (24:24) и Австрија (20:20).

Следуваа уште две победи во разигрувањето за пласман од 9-16 место над Полска (28:26) и Романија (31:26), и имавме само еден пораз на шампионатот и тоа од Франција (25:18) против која денеска се реванширавме.