Основното јавно обвинителство Скопје соопшти дека обезбедило докази поради кои основано се сомнева дека тројца луѓе, од кои едниот вработен во казино во скопската населба Бутел, извршиле тешка кражба во казиното на 11 април.

Јавниот обвинител повел истрага бидејќи постои сомнение дека тројцата се дружиле за да извршат кражба и од казиното одзеле 1.460.856 денари (околу 24.000 евра), соопшти ОЈО.

„Претходниот ден, осомничените – двајца браќа на возраст од 20 и 22 години, како и 29-годишник вработен во казиното, седеле во кафе бар и се договориле како да ја извршат кражбата. Според договорот, на критичниот ден, осомничениот вработен во казиното им дал знак кога е погодно време за реализација на кражбата. Браќата дошле со автомобил пред казиното, при што едниот останал во возилото, а другиот маскиран насилно влегол во објектот, се упатил кај касата и првично му покажал пиштол на вработениот – осомничен како да му се заканува. Потоа пиштолот го оставил на пултот и заедно ја наполниле торбицата со парични средства од вкупниот промет од претходниот ден, со намера противправно да ги присвојат. Веднаш потоа двајцата браќа избегале од местото на настанот“, пишува во соопштението на Обвинителството.

Еден од осомничените за грабежот е во бегство, велат од ОЈО.

„Јавниот обвинител, ценејќи ги сите околности и исполнетоста на законските основи, до судијата на претходна постапка достави предлог за определување мерки на претпазливост за двајца осомничени кои се лишени од слобода. Се предлага забрана за напуштање на живеалиштето, обврска да се јавуваат повремено на определено службено лице во Судот, привремено одземање на патните исправи, забрана за посетување на казиното и забрана за приближување, воспоставување или одржување контакти со останатите осомничени. За третиот осомничен, кој е во бегство, предложено е определување мерка притвор која ќе започне да се применува по неговото пронаоѓање и лишување од слобода“, се вели во соопштението.