Борче Костовски, тренерот на олимпискиот медалист, е оптимист: Георгиевски е како борбен авион на полетување
Радува подемот на формата на нашиот сребрен олимписки медалист во пресрет на турнирот Кроација опен и во трката за олимписка норма за ЛОИ Париз 2024, смета неговиот тренер Борче Костовски. На неодамнешните неколку турнири Георгиевски освојуваше медали
Дејан Георгиевски во моментов е како борбен авион на полетување. Вака ја опиша формата на македонскиот олимписки медалист Георгиевски, неговиот тренер Борче Костовски, во пресрет на турнирот во Загреб кој на програмата е претстојниов викенд.
Летните олимписки игри во Париз 2024 полека се ближат. Целта на Георгиевски е прво да дојде до олимписка норма за настап на Игрите во градот на светлината, а потоа и да освои трофеј на Игрите.
Препорачано
– Формата на Георгиевски е во подем, како борбен авион на полетување. Оди нагоре и тоа е најважно. Полната височина се уште не ја достигнал, но радува фактот што е се подобар и подобар. Целта ни е постигнување олимписка норма што ќе му овозможи настап на ЛОИ 2024. Реално е да се очекува тоа и да го постигне. Што се однесува до настапот на следниот турнир во Загреб, целта е влез во финалето. Секогаш, на секој турнир, првата цел што си ја поставуваме е влез во финалето – вели Костовски.
Со добар настап Георгиевски ќе освои уште неколку поени значајни во трката за олимписка норма.
По турнирот во Хрватска, следуваат и турнири во Црна Гора, Романија, Шведска, сите се распоредени во временско растојание од неколку недели. Според Костовски, би било добро Георгиевски да настапи на сите, но, во најмала рака би настапил на еден или два турнири.
– Покрај тоа што формата му е во подем, добро е тоа што тој ментално е максимално фокусиран на она што следува. Впрочем, менталната сила отсекогаш била на највисоко ниво и константа кај овој врвен спортист – вели Костовски.
Својот резултатски подем Георгиевски го покажа и на неговите неколку неодамнешни настапи. Членот на ТК Бутел од Скопје на почетокот на месецов го освои првото место на Г1-турнирот во Тирана (категоријата 87 килограми), со што освои нови поени во рангирањето за пласман на ЛОИ. Една недела пред тоа на турнирот во Белград, од серијата Г1, го освои второто место.
Моментно Георигевски е на осмото место на светската ранг-листа во неговата категорија, а олимписка норма обезбедуваат првите петмина. Тој има реални шанси да дојде до петтото место а ако не му успее тоа, шанса му е да свои норма на квалификацискиот турнир на 24 февруари во Нирнберг.
– Сметам дека Дејан Георгиевски речиси сто отсто е сигурно оти ќе дојде до норма за учество на ЛОИ 2024 – ни изјави Владимир Богоевски, спортски директор на Македонскиот олимписки комитет.
Дејан Георгиевски на минатите Летни олимписки игри во Токио освои сребрен медал, што е оценето како најголем успех на македонскиот спорт од осамостојувањето на земјава.
