Македонскиот фудбалер Бобан Николов повеќе нема да биде дел од Борац Бања Лука. Како што јавува босанскиот портал „Спортспорт.ба“, 30-годишниот фудбалер за врска нема да го продолжи договорот кој веќе му истече на 31 мај.

Николов во Борац пристигна лани од унгарската Кишварда како едно од најзвучните засилувања. Во текот на минатата сезона, тој одигра 27 натпревари во Првата лига на Босна и Херцеговина, дополнително настапи девет пати на европската сцена и уште пет пати во националниот куп. Неговата стабилна форма беше еден од клучните фактори во резултатите на Борац, кој сезонава имаше високи амбиции.

Николов зад себе има богата кариера со настапи во неколку европски клубови, меѓу кои се ФЦСБ, Шериф Тираспол, Лече, Фехервар, Виторул Констанца и скопски Вардар, каде што и го започна својот професионален пат.

Сега, како слободен играч, македонскиот интернационалец може да избере нова средина и нов предизвик.