Усеин Болт, најбрзиот човек во историјата и еден од најголемите атлетичари на сите времиња, беше гостин во Белград како дел од промотивните активности за ЕКСПО 2027.

Легендарниот Јамајканец даде интервју за РТС, а највпечатливиот дел од разговорот се однесуваше на српските спортисти кои тој особено ги почитува.

Иако за време на средбата со претседателот на Србија, Александар Вучиќ, не се зборувало директно за Новак Ѓоковиќ (кој е во немилост на Вучиќ и властите поради поддршката на студентските протести во земјата) или барем тоа не беше јавно споделено, Болт отворено го издвои Ѓоковиќ како еден од најголемите.

„Постои тројка што се издвојува, тоа се Ѓоковиќ, еден од најдобрите, ако не и најдобриот тенисер во историјата, потоа Никола Јокиќ од Денвер Нагетс, иако јас навивам за Голден Стејт и еден од најдрагите за мене, Немања Видиќ, кој играше за мојот омилен клуб Манчестер јунајтед и има посебно место во моето срце“, посочи Болт.

Сопственикот на осум олимписки златни медали истакна дека неговата инспирација секогаш била поврзана со спортските легенди.

„Мајкл Џордан и Мухамед Али, Пеле,  тоа беа имињата што ми беа идоли. Сакав кога ќе се зборува за спортски легенди, да се зборува и за мене. Затоа вложив сè од себе, работев напорно и решив да бидам еден од најдобрите спринтери на светот“, изјави Болт.