Тони Трајковски, поранешен градоначалник на Гази Баба денеска не дојде на рочиштето за предметот „ТНТ“.

Неговиот адвокат извести дека неговиот клиент поради здравствени причини не е во можност извесен период да присуствува на рочиштето. Во судница дојде доктор Викторија Вујовиќ, психијатарот кој го лекува Тони Трајковски.

Поради приватноста и тајноста на дијагнозата, судијата Огнен Ставрев додека сведочи Вујовиќ ја исклучи јавноста. По дадениот исказ, судијата Ставрев извести дека обвинетиот Трајковски имал кратко, десетдневно боледување и дека процесот продолжува на 6 феврури.

Во овој предмет обвинет е екс премиерот Никола Груевски, кој според обвинението наредил да му биде уништен со експлозив комплексот „Космос“ на Фиат Цаноски, затоа што во 2011 како лидер на ПЕИ и пратеник ја прекина коалицијата со ВМРО-ДПМНЕ. Во овој предмет обвинети се и Миле Јанакиески како координатор на целата акција на незаконското уривање, ексградоначалникот на Гази Баба Тони Трајковски, Елизабета Најдовска и други обвинети од општина Гази Баба.