Американскиот производител на авиони Боинг тврди дека го има завршено развојот на софтверското решение за проблематичниот „737 Max“, објави „CNN“.

По 207 тест-летови во траење од 360 часа, од Боинг се подготвени да го пуштат во употреба ажурираниот софтвер на системот за контрола на летот, кој е под истрага поради учество во две авионски незгоди.

Софтверот, како што е објавено, сега е подготвен за проценка на американската Федерална управа за авијација (FAA) и нејзините партенери во земјите кои сакаат да извршат контрола над софтверот.

„Забележавме јасен и стабилен напредок, и уверени сме дека „737 Max“ со обновениот софтвер „MCAS“ ќе биде еден од најбезбедните авиони досега“, изјави генералниот директор на Боинг, Денис Муленбург.

Авионите од типовите „737 Max 8“ и „737 Max 9“ се приземјени ширум светот, откако пред два месеци се сруши авионот на „Етиопијан ерлајнс“.

Оваа незгода, според оценката на истражителите“, наликува на несреќата од минатата година кога се сруши „737 Max“ на индонезиската авиокомпанија „Лајон ер“. Во овие две кобни несреќи, животот го загубија 346 лица.

Во двата случаи, автоматизираниот систем за контрола на летот или „MCAS“ автоматски го навалуваше носот на авионот, додека пилотите се обидувале да ја вратат контролата.

Меѓутоа, сега од Боинг порачуваат дека по извршените поправки на „MCAS“ во иднина ќе добива податоци за двата, а не само за едниот сензор, поради што авионот помалку ќе биде подложен на пад поради погрешни податоци.