Со тело налик тенк и прекриен со „школки“ и боцки долги колку палки за голф, диносаурусот Спикомелус афер повеќе личел на измислено суштество отколку на реален организам. Палеонтолозите открија дека овој необичен вид, пред околу 165 милиони години, талкал низ поплавните рамнини на денешна Северна Африка, пишува „Гардијан“.

Фосилот, кој се смета за најстар познат примерок на анкилосаурус, е пронајден во близина на градот Булеман, во централниот дел на Мароко. Неговиот уникатен оклоп ги доведе во прашање досегашните теории за еволуцијата на анкилосаурусите – групата тревојади диносауруси препознатливи по нивната силна одбрана.

„Тој бил прекриен со боцки по целото тело. Имал огромна, непропорционална крагна околу вратот, потоа помали боцки по страните, а на крајот на опашката – некаква форма на оружје“, објаснува професорот Ричард Батлер од Универзитетот во Бирмингем.

Составувањето на изгледот било вистински предизвик – фосилот не е целосен, па научниците морале внимателно да ги редат оклопните делови и да проценат каде би можеле да стојат.

Анкилосаурусите живееле од средната јура до доцната креда, сè до ударот на астероидот што ја уништил најголемата група диносауруси. Се карактеризирале со здепеста градба и масивен оклоп, што ги правело бавни, а мозокот им бил релативно мал.

„Веројатно биле малку глупави, но биле мошне успешни – опстанале околу 100 милиони години“, вели Батлер.

Спикомелус афер бил долг околу четири метри и тежок приближно две тони. Иако недостасува крајот на опашката, сраснатите пршлени укажуваат дека имал оружје налик палка, кое најверојатно го користел за борба со предатори. Според научниците, ова покажува дека адаптациите за оружје на опашката се појавиле најмалку 30 милиони години порано од досега прифатеното.

Подоцнежните анкилосауруси имале поскромен оклоп чија функција била, пред сè, одбранбена. Боцките, пак, биле толку екстравагантни што, според истражувачите, веројатно имале улога во покажување доминација или во парење, а не во директна борба.

„Кога ќе го погледнете вратот и боцките што излегуваат од него, изгледа како претерување што само му го отежнувало животот“, нагласува Батлер.

Истражувањето било дополнително отежнато бидејќи каменоломот во кој бил пронајден фосилот често бил мета на нелегални собирачи. Само половина од скелетот е зачуван во официјални институции, додека други делови биле продавани на интернет за и до 10.000 фунти (околу 11.500 евра).

„Голем дел од материјалот веројатно завршил кај приватни колекционери, што е навистина тажен аспект на ова откритие“, предупредува Батлер.