Ако пред десетина години капиталните инвестиции беа 260-270 милиони евра годишно, во 2021 година достигнаа 385 милиони евра, што е подобрување од 100 милиони. Во 2022 година достигнаа 465 милиони евра, а минатата 2023 година достигнавме над 700 милиони евра за капитални инвестиции, изјави министерот за транспорт и врски, Благој Бочварски на конференцијата „Година на европски можности“.

Тоа, според него, значи развој на државата, изградба на патишта, железнички пруги, водоводи, канализации, социјални станбени згради и сѐ што значи развој и подобар живот за граѓаните.

Во врска со реализација на коридорите 8 и 10д, Бочварски кажа дека веќе има градежни активности, а течат и постапки за проектирање, експропријација. Исто така механизација и работа на терен има и на железничката пруга на Коридорот 8, од Куманово до Крива Паланка, инвестиција вредна 200 милиони евра.

Како што кажа тој, градежништвото сега доживува рестарт, а тоа е поради градежната реформа, и сега е шанса Владата да покаже дека инфраструктурата е приоритет.