Германскиот автомобилски гигант „БМВ“ соопшти дека стотици илјади негови автомобили итно треба да одат на сервис поради сериски дефект кој во екстремни случаи може да предизвика пожар, јавува „ТТЊуз“.

Проблемот е во анласерот, кој кај одредени модели може да ‘рѓоса и да направи краток спој.

Според информациите од Германија, засегнати се повеќе модели произведени помеѓу септември 2015 и септември 2021 година.

Иако „БМВ“ не откри точен број на автомобили кои се повлекуваат, познато е дека се работи за 136.500 возила во Германија и околу 195.000 во САД. Вкупната бројка е веројатно значително поголема, бидејќи кампањата ги опфаќа и азиските и останатите европски пазари, пренесе ДПА.

Компанијата предупредува дека во анласерот може да навлезе вода која ќе предизвика корозија, а во одредени случаи е можен краток спој и прегревање на анласерот и пожар, дури и кога автомобилот е паркиран.

Американската Национална управа за безбедност на сообраќајот (NHTSA) ги советува сопствениците на погодените возила избегнуваат да ги паркираат во затворен простор и советува засегнатите автомобили да се паркираат на отворено и подалеку од згради, сè додека дефектот не биде отстранет.