Телата на еден Македонец и двајца Срби кои биле убиени во Јужна Америка, се пронајдени во црни пластични кеси, но властите во јужноамериканската држава засега официјално не соопштуваат детали за бруталниот случај, пишува „Блиц“.

Според српскиот портал, неофицијално жртвите биле мачени, а потоа ликвидирани во Боливија.

„Телата се испратени на обдукција за да се утврди точната причина за смртта. Жртвите сè уште не се официјално идентификувани. Врз основа на првичните индиции, се сомнева дека прво биле брутално мачени, потоа убиени, а потоа спакувани во црни пластични кеси“, наведуваат извори од истрагата.

Полицијата смета дека Македонецот и српските државјани, кои живееле во Ниш пред да ја напуштат земјата, биле убиени пред два дена. Познаници на убиените добиле информации за нивната егзекуција од српски државјанин кој престојувал во Јужна Америка со нив, пишува „Блиц“ повикувајќи се на неименуваниот извор.

„Целото нишко подземје зборува за ова од утрово. Последните информации што пристигнаа се дека едниот од нив е Миљан Ѓ., познат како Хитри, другиот Дејанчо Л., кого сите го знаеме по прекарот Македонец, а третиот е познат како Малиот Коста“, додаде изворот.

Патем, се сомнева дека тројцата убиени биле во Боливија подолго време и дека тесно соработувале со таканаречениот „балкански картел“ во трговијата со кокаин.

„Јавна тајна е што правеле и зошто отишле на другата страна од светот. Тие наводно се поврзани со криминална група за која работеле во „логистика“, односно дел од работата поврзана со набавката, пакувањето и товарењето на кокаин на океански бродови“, вели изворот на „Блиц“.

Познато е дека членовите на таканаречениот „балкански картел“ тесно соработуваат со криминални групи од Јужна Америка, од кои набавуваат кокаин, а потоа го испраќаат во Европа преку бродови.