Една од фирмите кои работеле на реновирањето на основното училиште во српското село Сараново кај Крагуевац, во кое изминатиот викенд се урна покрив од училница само неколку месеци по завршувањето на работите, е во сопственост на Марко Босанац, бизнисмен од Нови Сад близок до владејачката Српска напредна партија на Александар Вучиќ, објави „Нова.рс“.

Станува збор за фирмата „Монтоп про технологија“, која како дел од група изведувачи го добила тендерот за изведба на работите во училиштето, вреден над 40 милиони динари (околу 370.000 евра).

Во издвоениот дел од Основното училиште „Караѓорѓе“ во селото Сараново во општината Рача за време на неработните денови падна таванот во една училница, а учениците беа пратени дома, откако било одлучено да нема настава во реконструираната училишна зграда.

Голема среќа е што нема жртви бидејќи, како што пренесуваат локалните медиуми, таванот паднал во деновите кога во училницата немало ученици. Реконструкцијата на објектот завршила на крајот на минатата година.

Фирмата „Монтоп про технологија“, како што може да се види од документите достапни на веб-страницата на Агенцијата за деловни регистри, е ќерка на фирмата „Монтроп про“, која повторно е во сопственост на Агенцијата за привремени вработувања Монтоп ХРС од Нови Сад, чиј стопроцентен сопственик е Марко Босанац.

Фирмите на овој бизнисмен од Нови Сад изминативе години бележат повеќекратно зголемување на приходите благодарение на профитабилните зделки со јавниот сектор, а сопственикот на групацијата „Монтоп“, Марко Босанац, попознат како Боске, важи за еден од клучните луѓе на Напредната партија во Нови Сад. Во изминатите години, компанијата добивала повеќе тендери за читање на броила за електрична енергија.

Контроверзниот бизнисмен се појави како „водач“ на симпатизерите на владејачката партија на митинг во салата „Спенс“ во Нови Сад во 2023 година, кога со мегафон предводеше скандирање од трибините, како да се работи за спортски натпревар. Босанац во 2021 година беше обвинет за напад на учесници на демонстрации против отворање на рудници за литиум и компанијата „Рио Тинто“. Тој важи за многу близок до поранешниот градоначалник на Нови Сад и доскорешен српски премиер, Милош Вучевиќ, пишуваат српските медиуми.