Маж е обвинет за убиство од втор степен во САД, откако тој, наводно, застрелал и убил 20-годишна жена бидејќи таа со нејзиниот автомобил несакајќи влегла во патеката која водела кон неговиот дом, пишува „Би-Би-Си“.

Кејлин Гилис била со уште тројца во државата Њујорк во саботата. Тие случајно влегле во патеката на Кевин Монахан во градот Хеброн, соопшти полицијата.

Додека таа се обидела да се врати назад, Монахан (65), наводно отворил оган врз возилото, погодувајќи ја Гилис.

„Ова е многу тажен случај на неколку млади луѓе кои ја бараа куќата на пријателот и завршија во куќата на овој човек кој реши да излезе со огнено оружје и да пука кон нив“, рече шерифот од Вашингтон, Џефри Марфи на прес-конференција.

Областа е рурална, а патеките се слабо осветлени ноќе. Ниту еден од групата не излегол од возилото или не се обидел да влезе во куќата на Монахан пред тој, наводно, да отвори оган, рече Марфи.

„Очигледно немало закана од никој во возилото“, рече шерифот Марфи. „Нема причина господинот Монахан да се чувствува загрозен“.

Пријателите се оддалечиле од куќата и се обиделе да повикаат помош во блискиот град, но Гилис била прогласена за мртва од болничарите.

Монахан „не соработувал со истрагата и одбил да излезе од неговата резиденција за да разговара со полицијата“, се вели во соопштението од канцеларијата на шерифот.