Американскиот продуцент и рапер Шон Комбс, познат по сценското име Диди, е обвинет за силување и физичко насилство, пишува „Пејџ сикс“.

Тужбата против раперот ја поднесе неговата поранешна девојка, пејачката Касандра Вентура, попозната како Каси.

Во тужбата, таа навела дека Диди го запознала во 2005 година, кога имала 19 години. Тие ја започнале врската, а раперот, тврди пејачката, ја контролирал уште од самиот почеток и бил насилен кон неа. Таа изјавила дека ја терал на секс со машки проститутки додека снимал сѐ, физички ја малтретирал и ја дрогирал.

Каси тврди дека Диди бил склон кон „неконтролирани бесови“ и честопати „дивјачки ја тепал“. Наводно, тоа се случувало пред неговите вработени, а Диди, вели пејачката, често ја терал да го носи неговото огнено оружје во чантата „за да се сети дека тој е способен сериозно да ја повреди“.

Таа, исто така, се присети на ситуација пред крајот на нивната врска во 2018 година. Таа изјавила дека раперот, наводно, без дозвола влегол во нејзиниот дом и ја силувал.

„После години тишина и темнина. Конечно сум подготвена да ја раскажам мојата приказна и да зборувам за себе и за другите жени кои се соочуваат со насилство и злоупотреба во врските“, изјави Каси за странските медиуми.

Се огласи и адвокатот на раперот, Бен Брафман. Тој ги отфрли сите обвинувања на пејачката.

„Господин Комбс ги негира овие навредливи и срамни обвинувања. Г-ѓа Вентура постојано бара од него 30 милиони долари во последните шест месеци, заканувајќи се дека ќе напише книга за нивната врска на негова штета. Ова е јасна уцена“, рече тој.