Битолскиот состав „Код 369 (Code 369)“ минатиот викенд настапил во Славонски Брод, во рамките на традиционалниот „Славонија фест – ЦMЦ 200“. На градската тврдина Брод тие во живо го промовирале својот деби-албум „Stages of Love“, објавен под закрила на најголемата регионална дискографска куќа „Кроација рекордс“. Пред фестивалот, на конференција за медиумите, заедно со уште неколку регионални состави, тие пред новинарите дојдени за фестивалот го претставиле своето првенче.

Албумот „Stages of Love“ содржи дванаесет песни и тоа е првиот албум што го создадоа и снимија под името „Код 369“. Нивната музичка мисла е секогаш на границата помеѓу алтернативниот рок и комерцијалната рок и поп музика, задржувајќи ја свежината, слободата и авангардните идеи на првата категорија и прифатливоста на другата.

– Во нивните текстови може да се препознаат универзалните човечки и литературни вредности, љубовта како движечка сила и силата на поединецот како движечка сила кон најдоброто во себе – порачуваат од „Кроација рекордс“.

„Код 369“ е македонски бенд од Битола, формиран во 2020 година. Тие се продолжение на долгогодишната музичка дејност на членовите на „Памперс“: Ирена Димовска (вокал), Даниел Митревски (гитара, придружни вокали) и Иле Лулевски (тапани, придружни вокали). Во музиката на „Код 369“ се внесени нови музички моменти на фанк, џез и класични инструментализации, кои проткајуваат во препознатливата рок-основа и влијанија на современата музика во доменот на поп и рок музиката.

– Добиваме навистина убави реакции од публиката за нашите песни, тие го сакаат тоа што го компонираме и нашата музика ја прифатија како своја. Уживаат да нè слушаат и тоа е нашата омилена награда – изјавува вокалната солистка Ирена Димовска.

Летово, пред сите овие случувања, „Код 369“ потпишаа петгодишен ексклузивен издавачки договор со „Кроација рекордс“. На нивната работна посета во Загреб тие го снимија и првиот сингл на хрватски јазик, со наслов „Права љубав“.

(Текстот е објавен во „Културен печат“ број 144, во печатеното издание на весникот „Слободен печат“ на 3-4 септември 2022)