Ракометарите на Пелистер 2 продолжуваат со одличната форма и денеска со импресивни 46-25 го совладаа составот на Драчево во рамките на 15. коло, осигурувајќи си пласман во македонската Супер лига.

Битолчани доминираа од самиот почеток, наметнувајќи го ритамот и темпото на играта, а веќе по првите 30 минути беше јасно во кој правец ќе се движи натпреварот – на полувреме резултатот гласеше 23-10. Гостите од Драчево немаа одговор за разиграните ракометари на Пелистер 2, кои продолжија во ист стил и во вториот дел, за на крајот да впишат убедлив триумф.

Со оваа победа, Пелистер 2 останува на лидерската позиција со 28 бодови по 15 одиграни натпревари. На второто место се наоѓа Мулти Есенс со 25 поени, а до крајот на регуларниот дел од сезоната остануваат уште три кола.