Европската ракометна федерација ги објави имињата на екипите што ќе настапуваат во новата сезона од Лигата на шампионите, а македонскиот шампион Еурофарм Пелистер доби зелено светло за својот трет последователен настап во најелитното европско натпреварување.

Битолската гордост ќе има нова можност да ги одмери силите со најдобрите ракометни клубови на континентот, а битолчани повторно ќе можат да уживаат во ракомет од највисок ранг.

Покрај Пелистер, вајлд-карти добија уште и Келце, ПИК Сегед, Нант, Колстад и ГОГ Гудме, кои ќе се приклучат на веќе потврдените учесници: Магдебург, Фуксе Берлин, Барселона, Веспрем, Висла Плоцк, Алборг, Динамо Букурешт, ПСЖ, Загреб и Спортинг Лисабон.

Шеширите за ждрепката ќе бидат објавени во среда, додека извлекувањето на групите ќе се одржи в петок во Виена. Еурофарм Пелистер ќе ја отвори новата европска сезона на 10 или 11 септември.