4 март 1966 година. Џон Ленон и Битлси веќе важеа за големи ѕвезди, но тогаш пејачот кажа нешто што за малку ќе му ја уништеше кариерата – и неговата и на целата група.

Сè започнало прилично наивно… Во март 1966 година неделниот весник „Лондон ивнинг стандард“ објави интервју со членовите на мегапопуларната група – „Битлси“. Во текстот со наслов „Како живеат бубачките“, Џон, Ринго, Џорџ и Пол зборуваа за списанието, но до денес се памети само она што го кажа Џон Ленон.

Бидејќи Ленон тогаш изјави дека Битлси се „попопуларни од Исус“!

Целиот цитат одеше вака:

„Христијанството ќе помине. Ќе се намали и ќе исчезне. Не треба да се расправаме околу тоа – во право сум и ќе се докаже дека сум во право. Ние сме попопуларни од Исус во моментов. Не знам што ќе исчезне прво – рокенролот или христијанството. Исус беше добар, но неговите следбеници се слаби и обични. Тие се оние кои го искривуваат и уништуваат христијанството“.

Интервјуто било објавено и не предизвикало никаква реакција во Велика Британија. Ден потоа, пиарот на „Битлси“ понудил права за интервјуто на американскиот магазин за тинејџери „Datebook“. Текстот бил објавен, на насловната страница имало фотографија од Битлси и наслов „Не знам што ќе исчезне прво – рокенролот или христијанството“.

А потоа настанал хаос…

Низ Америка избувнале протести против турнејата што требало да ја започнат „Битлси“ во таа земја. Некои радио станици престанале да ги пуштаат нивните песни, конференциите биле откажани, а имало дури и случаи на јавно палење на нивните плочи. Озлогласениот Кју Клукс Клан отишол дотаму што јавно им се заканил на сите четворица членови на „Битлси“ со смрт доколку се осмелат да стапнат во Америка.

Откако протестите почнале да се шират во други земји, вклучително и Мексико, а песните на „Битлси“ биле официјално забранети во Шпанија и Јужна Африка, менаџерот на групата организирал конференција за печат во Чикаго на 11 август 1966 година, на која Ленон изјавил дека неговата изјава е „извадена од контекст“ и им се извинил на сите христијани чии чувства ги повредил.

– Да реков дека телевизијата е попопуларна од Исус, веројатно никој немаше да реагира – додал тој, објаснувајќи дека само сакал да пренесе како другите луѓе гледаат на бендот.

Последиците од оваа изјава се чувствуваа со години. Историчарите на „Битлси“ често го толкуваат овој настан како причина поради која членовите на бендот одлучија да престанат да одржуваат концерти и на крајот доведе и до негово распаѓање.

Марк Дејвид Чепмен, човекот кој го уби Џон Ленон на 8 декември 1980 година, токму таа изјава ја нарече „богохулна“ и една од причините зошто пукал во пејачот.