Промоцијата на биографската публикација за Горан Трајкоски – Готра од едицијата „Македонски рок архив“ на Тошо Филиповски се одржа на 30 ноември во рамките на 11. ПИН Музичка конференција во МКЦ во Скопје. Промотор на монографијата беше Ристо Солунчев, професор на Филозофскиот факултет во Скопје, хип-хоп артист и проучувач на византиското музичко наследство.

Во книгата се поместени повеќе од 300 фотографии (половина досега необјавени), комплетна биографија и дискографија на Горан Трајкоски, текстови, плакати, влезници за концерти, како и листа на сите театарски претстави за кои тој има создавано музика. Монографијата е издание на „Корпус деликти рекордс“ во тираж од 500 примероци во A4 формат на 344 страници со обвивка во тврд повез.

Горан Трајкоски – Готра е меѓу најплодните и најинвентивни музички автори кај нас. Беше дел од бројни музички проекти, меѓу кои се издвојуваат „Сарацени“, „Афективен набој“, „Падот на Византија“, „Апореа“, „Мизар“, „Анастасија“ и „Мугер Фугер“.

Во новиот милениум се издвојува под псевдонимот ГоТра и интензивно ги „експлоатира“ современите електронски помагала. Во однос на својата целосна посветеност на музичката уметност Готра изјавува: „Музиката е алатка со која си ја форматирам смислата на живеење. Глас со кој му се обраќам на Бога!“

Приредувачот и уредник на публикацијата, Тошо Филиповски, во предговорот на книгата истакнува: „Музичката биографија за Горан Трајкоски е раскажана на начин на кој јас сум ја перципирал, низ децениите, како фан и како новинар, и повторно само како фан.“ Тој верува дека биографските книги за „Мизар“ и Горан Трајкоски се само пионерски почеток за една нова гранка во македонската публицистика, која на некои идни генерации може да им биде предизвик да ја продолжат.

– Овие книги не се „комерцијални“ музички приказни полни со лични пикантерии, но тврдам дека се искрени опсервации за едни реални судбини на луѓе што својот живот ѝ го посветуваат на музиката и на борбата за поквалитетна животна и духовна средина – потенцира Филиповски.

(Текстот е објавен во „Културен печат“ број 260, во печатеното издание на весникот „Слободен печат“ на 14-15.12.2024)