Американската потпретседателка Камала Харис се појави на првата официјална посета на нејзиниот изборен штаб во понеделникот вечерта, додека во позадина одеше песната „Слобода“ на Бијонсе.

Извор близок до Камала Харис изјави за „Си-ен-ен“ дека нејзиниот тим добил одобрение од претставниците на пејачката да ја користи песната за време на нејзината претседателска кампања.

Бијонсе, која е позната по тоа што следи строги упатства кога станува збор за нејзината музика, брзо го одобри барањето од кампањата на Камала Харис кога тие побараа дозвола да ја користат песната „Freedom“ – само неколку часа пред таа да излезе на сцената токму со таа песна, додал изворот.

MOTHER!

Kamala Harris uses ‘FREEDOM’ by Beyoncé & Kendrick Lamar as her very first walk up song on her presidential campaign. pic.twitter.com/O8hEIHXnDb

— COWBOY CARTER Updates ? ⭑ (@B7Album) July 22, 2024

Иако Бијонсе официјално не ја поддржа Харис откако претседателот Џо Бајден објави дека нема да се кандидира за втор мандат, давањето дозвола за „Freedom“ како песна за кампањата покажува дека Харис ја има поддршката на суперѕвездата.

Бијонсе има историја на поддршка на демократските кандидати. Во 2013 година, таа ја пееше националната химна на инаугурацијата на претседателот Барак Обама. Во 2016 година, Бијонсе и нејзиниот сопруг Џеј Зи настапија на предизборниот концерт во Кливленд, Охајо за Хилари Клинтон, која се очекуваше да стане првата жена претседател.

Во 2020 година, Бијонсе ја поддржа кампањата на Бајден и Харис на нејзиниот Инстаграм за да ги охрабри нејзините следбеници да гласаат.