По повод концертот „Мизар + Хармосини: Гласови“, што ќе се одржи на 12 мај, со почеток во 20 часот, во Македонска филхармонија, на 9 мај во просториите на концепт-продавницата „Екотип“ се одржа прес-конференција на која беа објавени деталите за овој уникатен музички настан.

Концертот „Мизар + Хармосини: Гласови“ e уникатен настан, последното откровение на култната македонска група „Мизар“. Заедно на сцената ќе се појават со хорот „Хармосини“ и 17 познати македонски музичари инструменталисти, предводени од аранжерот и диригент Дени Омерагиќ.

На прес-конференцијата, која беше модерирана од новинарот Љупчо Јолевски, присуствуваа фронтменот Горазд Чаповски и бас-гитаристот Илија Стојановски од оригиналната постава на „Мизар“, аранжерот и диригент Дени Омерагиќ и раководителот на хорот „Хармосини“, Ристо Солунчев.

– Идејата за концертот тлееше од поодамна, а минатата година ми се јави Зоран Митровиќ од „Чув де чув“ со предлог-идеја за концерт и ја прифативме. Досега сме имале рок и електронски поставки на музиката, но не сме имале акустична изведба со оркестарска верзија на песните и сега дојде моментот да се појавиме на сцена и со таква формација – објасни фронтменот на „Мизар“, Горазд Чаповски.

Селекцијата на темите ја направил аранжерот и диригент Дени Омерагиќ. Бидејќи концертот е заеднички со хорот „Хармосини“, биле селектирани теми во кои се чувствува византиското музичко влијание, а во финалниот список влегле песни од сите албуми на „Мизар“.

Така, безвременските „1762“, „Амфилохиј“, „Сина соба“, „Дождот“, „Градот е нем“, „Глас“, „Почесна стрелба“, „Константинопол“, „Бело море“, „Ходен же“, „Златно сонце“ ќе прозвучат моќно во ултимативна оркестарска верзија, донесувајќи ново руво на песните на „Мизар“, еден од бедемите на македонската музика, култура и национален идентитет.

– Селекцијата се одвиваше спонтано, од поширок кон потесен список песни што ќе бидат изведени на концертот. Притоа имавме предвид песните да имаат логично место во ансамблот со кој функционираме сега и со кој ќе настапиме на концертот. Внимававме и на моментот да бидат покриени различни периоди од работата на групата. Исто така, анализиравме кои песни би можеле аранжерски да се расклопат и повторно да се склопат во ново руво, со што ќе им се даде нов живот, без да направиме компромис со квалитетот – објасни Дени Омерагиќ.

Вокалниот акцент на концертот ќе биде ставен на византиското пеење и во таа смисла раководителот на хорот „Хармосини“, Ристо Солунчев, рече дека со Горазд Чаповски комуницираат на едно „друго ниво“ во поглед на музиката и на филозофијата. Тој посочи дека хорот „Хармосини“ сосема спонтано се појавува како главен вокал на концертот.

Компанијата „Екотип“ во своето 26-годишно постоење секогаш ги поддржувала иновациите, одржливиот развој и вистинските трајни вредности. Како генерален спонзор, главен мотив за поддршка на концертот „Мизар + Хармосини: Гласови“ е нивната мисија за негување на одржливиот развој на општеството и промоција на културата како ѕвезда-водилка.

(Текстот е објавен во „Културен печат“ број 230, во печатеното издание на весникот „Слободен печат“ на 11-12.5.2024)