Според информациите на Јавното претпријатие „Лајка“, утрово непознат насилник фрлил куче од голема височина од платформата на Железничката станица во Скопје.

Тимот на „Лајка“ веднаш интервенирал и го префрлил повреденото куче во амбуланта, каде биле вложени максимални напори за негово спасување. Сепак, и покрај борбата на ветеринарите, кучката, позната како Нори, не преживеала поради силно внатрешно крвавење.

Според коментарите на објавата на „Лајка“ на „Фејсбук“, Нори не ѝ била непозната на јавноста. Оваа мешанка и во 2023 година поминала третман во „Лајка“, а често била забележувана на повеќе локации низ градот. Граѓаните коментираат дека станува збор за питомо и мирно куче кое никому не пречело.

Од „Лајка“ велат дека „овој сурово одземен живот нема да остане незабележан“ и најавуваат дека настанот веднаш ќе биде пријавен до надлежните институции.

„Апелираме тие да ги искористат сите механизми за пронаоѓање и санкционирање на сторителот на ова тешко кривично дело,“ порачаа оттаму.

Истовремено, од „Лајка“ упатуваат апел и до граѓаните – доколку бидат сведоци на вакви дела, веднаш да ги пријават во полиција. Само со заедничка реакција може да се стави крај на ваквото насилство и да се изгради општество во кое животите на животните се почитуваат, велат од „Лајка“.