Скопското Обвинителство поведе постапка против 60-годишен жител на Скопје, кој е осомничен за кражба на пари од џебот на човек болен од рак кој чекал ред да прими терапија на Клиниката за радиотерапија и онкологија.

Според ОЈО, крадецот го искористил невниманието на пациентот од велешко, ја протнал раката во неговиот џеб и му украл 300 евра и 28.000 денари или вкупно нешто помалку од 800 евра.

„Пациентот малку подоцна забележал дека му се украдени парите и пријавил во полиција, а сторителот бил идентификуван од снимките на видео камерите во болницата“, соопшти Обвинителството.

Имајќи предвид дека сторителот бил и претходно осудуван, како и дрскоста со која делото сега го извршил во медицинска установа во која во исто време поголем број пациенти во тешка состојба, меѓу кои и оштетениот, чекале да примат терапија од која им зависи животот, јавниот обвинител на судијата на претходна постапка му предложи да определи мерка притвор за осомничениот, што беше прифатено“, додаваат од Обвинителството.