Вилите на „Радика ресорт“ во Леуново немаат водостопанска согласност која е неопходен предуслов за отпочнување на изградба на објекти кои испуштаат води во животната средина со што е прекршен Законот за водите, дознава „Слободен Печат“. Од Министерството за животна средина информираат дека до нив никогаш не било доставено барање за издавање на водостопанска согласност, позната уште и како водна дозвола, како што тоа го бара Законот за води, за изградба на објектите во склоп на хотел „Радика ресорт“ во крајбрежниот појас на Мавровското Езеро, ниту пак Секторот за води при Министерството бил вклучен во било кој дел од постапката за планирање и реализација на овие објекти.

Во согласност со Законот за водите, водостопанска согласност се издава „заради изградба на нови или за реконструкција или доградба на постојни објекти кои поминуваат преку или под површински води или пак објекти кои се сместени во близина на површинските води или крајбрежните земјишта, а кои можат да влијаат врз режимот на водите“. Бидејќи инвеститорот планирал 87 нови објекти кои требало да бидат приклучени на канализациониот испуст кој во моментов го користи хотелот Радика и кој испушта непречистена фекална канализација директно во водите на Мавровското Езеро, предуслов за изградба на овие објекти било добивање на водостопанска, односно дозвола за испуштање, која ја издава секторот за води при Министерството за животна средина.

Со оваа информација од Министерството за животна средина се потврдуваат наодите до кои дојде „Слободен печат“, а тоа е дека и во случајот со вилите на Радика, како и во бројни други случаи на објекти изградени последниве неколку години на подрачјето на Национален парк „Маврово“ биле изигрувани и забошотувани законските обврски и процедури за градба. Ова е особено значајно бидејќи се работи за заштитено подрачје од втора категорија, односно национален парк, во кој, според важечките закони, меѓу кои и Законот за заштита на природата е предвидена забрана за „спроведување на активности со кои се загрозува изворноста на природата во националниот парк, како и палење на огин на територијата на националниот парк, освен на посебно утврдени места дефинирани со планот за управување на националниот парк“.

Од Министерството за животна средина добивме писмен одговор и на прашањето  колкупати Општина Маврово-Ростуше од нив побарала мислење за урбанистичка документација за територија под заштита на НП Маврово:

„Во последниве пет години од страна на Општината до Секторот за природа при МЖСПП нема доставено ниту едно барање за добивање на стручно мислење по било која планска документација за Маврово“.

Сепак, крај Мавровското Езеро е повеќе од видливо со колкав интензитет последниве неколку години се одвива градба на помали и поголеми објекти во Маврово, што значи дека и локалната самоуправа, како и приватните инвеститори, свесно ја прескокнале законската обврска да побараат соодветни одобренија од надлежните државни институции.

„Со оглед на тоа дека веќе се градат објекти крај хотелот Радика, одговорот треба да се бара во државен Инспекторат за животна средина,  Градежниот инспекторат, Секторот за урбанизам во општина Маврово и Ростуша како и ЈУНП Маврово “, упатуваат од Министерство за животна средина.