Без минимум 4.000 денари во џеб нема почеток на школската година
Во оваа пресметка секако не е вклучено и одбележувањето на првиот училишен ден, кој со години веќе традиционално се прославува со трпеза за бабите и дедовците кои доаѓаат на гости да му посакаат успешен почеток на своето внуче
Од крајот на август, до почеток на септември, бизнисот на книжарниците цвета и ги покрива сите трошоци и загуби од летниот период. Почетокот на школската година значи и нов школски прибор. Родителите кои оваа година имаат првачиња ќе треба да потрошат во просек околу 4.000 денари само за материјалот што им е потребен за настава. Но, потребна ќе биде и нова облека, обувки, опрема за физичко, средства за хигиена, со што родителите кои имаат првачиња во просек би потрошиле од 150 до 200 евра.
Препорачано
„Слободен печат“ направи обиколка на неколку книжарници и маркети, каде што може да се најде потребниот материјал. Во просек, ранците се движеа од 500 па сè до 6.000 денари, во зависност од брендот и квалитетот. Во маркетите и на тезгите на пазарите ранците се поевтини, за разлика од книжарниците.
Тетратките А4 формат чинат од 40 па сè до 150 денари.
Моливи има од 15 до 40 денари, острилки за 30 денари, а гумите за бришење варираат од 10 до 75 денари. Најевтиниот празен несесер е 100 денари, додека оние несесери кои имаат комплетен прибор можат да се најдат и за 400 денари.
На првачињата ќе им бидат потребни и блок, темперни, дрвени, мрсни боици, колаж, четки, линијар, папки и друг материјал, што може родителите да ги чини околу 2.000 денари, но и повеќе, во зависност за кој бренд ќе се одлучат.
Во оваа пресметка секако не е вклучено и одбележувањето на првиот училишен ден, кој со години веќе традиционално се прославува со трпеза за бабите и дедовците, кои доаѓаат на гости да му посакаат успешен почеток на школската година на своето внуче. Ако сакате да го одбележите овој ден со гости, веројатно ќе треба да одвоите уште толку средства.
Цената на севкупниот школски прибор зависи од брендот и квалитетот, може да се најдат материјали кои се поевтини и поскапи.
Помош од општините за првачињата
Олеснителна околност е тоа што дел од општините доделуваат парична помош или бесплатни ранци и прибор. Градоначалниците од неколку скопски општини најавија дека и оваа година ќе излезат во пресрет на родителите кои имаат првачиња.
Општина Центар трета година по ред доделува ранци за сите првоодделенци запишани во осумте основни училишта во општината.
Општина Аеродром ќе доделува еднократна парична помош за семејствата чие дете е прваче во едно од основните училишта на територијата на општината во висина од 3.500 денари.
Бесплатни ранчиња, но и училиштен прибор ќе добијат сите првачиња кои во септември ќе го започнат своето образование во училиштата во општина Кисела Вода.
Општина Бутел ќе обезбеди високо квалитетен анатомски ранец со потребен училишен прибор.
Семејствата, пак, кои имаат запишано прваче во училиштата на територија на општина Гази Баба треба да поднесат барање за добивање на еднократна финансиска поддршка од 3.000 денари.
