Нашиот вид најчесто го земаме „здраво за готово“, сè додека не се појави некој здравствен проблем. Проблемот со кратковидоста (миопија) постојано се зголемува, а една студија предвидува дека до 2050 година речиси половина (49,8 отсто) од светското население ќе има здравствени проблеми со видот, пишува „Индепендент“.

Извештајот на Светската здравствена организација (СЗО) предвидува драматично зголемување на потребата за нега на очите во блиска иднина, истакнувајќи дека најмалку 2,2 милијарди луѓе ширум светот веќе имаат оштетен вид – а околу половина од нив имаат губење на видот што би можело да се спречи.

„Некои луѓе можеби нема да посветат доволно внимание на своето здравје на очите и ќе пропуштат годишни прегледи кои играат клучна улога во откривањето на состојби како што се катаракта, глауком и макуларна дегенерација поврзана со возраста. Кога ќе се откријат и третираат рано, овие проблеми можат ефикасно да се менаџираат со цел да се зачувува видот“, вели офталмологот д-р Јорн Слот Јоргенсен.

Јоргенсен забележува дека пандемијата исто така одигра значајна улога во влошувањето на проблемите со очите, особено зголемувањето на миопијата.

„Со преминувањето на работа на далечина, луѓето поминуваат многу повеќе часови пред екраните, и на работа и во слободно време. Грижата за здравјето на очите не е само прашање на удобност, тоа е основен аспект на нашата општа благосостојба“, додава д-р Јорн.

Офталмологот Јорн Јоргенсен и очниот хирург Евелин Менсах, која е член на советот на Кралскиот колеџ за офталмолози, наведуваат седум начини на кои го оштетуваме нашиот вид, без да го забележиме тоа.

Избегнувате на редовни прегледи

Докторите велат дека се препорачува да се прави очен преглед на секои две години, или почесто ако е препорачано од офталмолог.Доколку не се направат редовни очни прегледи, тоа може да доведе до состојби како што се глауком, дијабетична ретинопатија и макуларна дегенерација на окото, кои во почетната фаза се развиваат без забележливи симптоми, остануваат неоткриени на време. Раното откривање е клучно за ефективен третман и зачувување на видот.

Останувате предолго пред екраните

Широката употреба на дигитални апарати како лаптопи, таблети и паметни телефони доведе до тоа да трошиме сè повеќе време гледајќи во екранот. Докторите велат дека тоа доведува до напрегање на очите, што се карактеризира со симптоми како суви очи, главоболки и заматен вид.

Носите очила за сонце без УВ заштита

Офталмолозите наведуваат дека ако очилата за сонце немаат соодветна УВ заштита, тоа ги изложува нашите очи на штетното ултравиолетово зрачење, што придонесува за катаракта и макуларна дегенерација поврзана со возраста. Исто така, велат дека изложувањето на УВ зрачење може да влијае и на формирање на израстоци на површината на очите, таканаречена птеригија.

Имате лоша исхрана и недостаток на хранливи материи

Здравата, урамнотежена исхрана може да помогне да се намали ризикот од болести опасни по видот, предсè  макуларната дегенерација, оштетување на централниот дел на мрежницата што најчесто се јавува кај постарите лица и предизвикува губење на видот во центарот на видното поле. Макулата – делот од мрежницата што го обработува она што го гледаме пред нас – содржи природни пигменти како што се лутеин и зеаксантин кои се наоѓаат во темно зелениот, лиснат зеленчук како спанаќот и кељот.

Пушите

Ако сте пушач, откажувањето од цигарите не само што ќе има корист за вашето општо здравје, туку и за здравјето на очите. Докторите велат дека откажувањето од пушење е еден од факторите, кој може да го намали ризикот од развој на одредени состојби како макуларна дегенерација и катаракта.

Не носите соодветни диоптриски очила

Постои широко распространета заблуда дека носењето диоптриски очила го влошува видот, но докторите велат дека ова апсолутно не е точно. Примарната причина за носење диоптриски очила е едноставно затоа што ви се потребни. Ако избегнувате да ги носите, ризикувате главоболка.

Несоодветно го осветлувате просторот во кој работите

Работата или читањето во слабо осветлена просторија може да доведе до напрегање на очите, непријатност и послаб вид. Офталмолозите истакнуваат дека доброто осветлување е од витално значење за создавање удобни услови за читање и работа.