Францускиот фудбалер Карим Бензема потпиша тригодишен договор со клубот од Саудиска Арабија, Ал-Итихад, објави денеска агенцијата „Франс прес“.

Информацијата за трансферот на Бензема во тимот од Џеда за „АФП“ ја потврди клупски извор.

Освојувачот на „Златната топка“ претходните 14 години беше член на Реал Мадрид, а со шпанскиот клуб петпати беше шампион на Европа и светот, се закити и со четири титули во „Ла Лига“.

Последниот меч за „кралевите“, 35-годишниот напаѓач го одигра во неделата против Атлетик Билбао (1:1), а единствениот гол за Реал го постигна Бензема од пенал.

Во својата професионална фудбалска кариера ги бранеше и боите на францускиот Лион.